Alhamdulillah hariko ambo dapek manyalasaian ciek karya. Tadi pagi naskah lah ambo kirim ka media guru. Ambo baru baraja manulih kutiko sato di MWC XXIII nan diadokan dek KPPL propinsi Sumatera Barat pimpinan ibuk Agusrida. Acara tu diadokan bulan Januari 2020 di hotel Rocky kota Padang.

Nan sato dalam acara tu, para pejabat dilingkungan kementrian Agamo Sumatera Barat, mulai dari Pak Kapalo bidang, Kamenag, Kasubag, Kasi, Pengawas dan Kapalo Madrasah. Kami baraja manulih jo Ceo Mohammad Ihsan jo Ceo Eko Prasetyo. Kasado nan sato sumangaik mmaikuik an satiok materi nan diagiahan nara sumber.

Hari katigo kami disuruh manulih judul jo sinopsis, ado sapuluah sinopsis nan ancak jo mamanuhi syarat. sahinggo lansuang dapek gambar kulik buku (cover). Tapi gambar kulik buku ambo alun kalua lai, karano pas kutiko baraja praktek manulih, ambo ndak sato do. Ambo pai ka kantua kamenag propinsi untuk sato acara pelantikan pangurus dharmawanita kebetulan suami ambo bakarajo di kantua wilayah tu.

Kami diagiah wukatu sabulan untuak manyalasain ciek buku. Paliang lambek tanggal 24 februari 2020, naskah buku tu lah harus dikirim melalui email ka media guru. Sajak pulang dari hotel tu, ambo ma ansua-ansua manulih nan takana. Sasudah ditulih babarapo halaman, ambo ulang mambaconyo, tu dipelok an tulisan nan kurang rancak bunyi jo bahasonyo. Ambo bausaho maluangkan wukatu untuak manulih, tapi kadang latiah pulang kantua tu tabik pulo maleh, makonyo lamo salasainyo.

Tapi dek lai di agiah sumangaik dek uda jo anak-anak, akhirnyo tanggal 23 Februari 2020, naskah tu lah bakirim, sahari sabalun hari terakhir.

Alah tu dulu sanak, hari lah hampia laruik malam, ambo mohon maaf kok ado kato nan indak tapek, karano ambo baru baraja. Ambo baharok dunsanak sadonyo manunjuakkan ambo caro manulih batua jo nan rancak.

Tarimo kasih kapado dunsanak nan alah namuah mambaco tulisan ambo.