" Hari lai rancak nampaknyo, Abi pai wak nah ka rumah abo" kecek ayah ka Abi. " Nah yah, Abi lah taragak lo main- main di tabek dakek rumah abo". Pailah ayah jo Abi ka rumah abo, rumah abo indak jauah bana do dari rumah Abi, naiak motor paliang sekitar limo baleh minit.

Sapanjang jalan ka rumah abo Abi jo ayah melewati sawah- sawah, tabek- tabek, dan kadai- kadai. " Abi nio bali kue ndak?" Kecek ayah. " Iyolah yah Abi nio bali goreang pisang untuak abo, abo kan suko jo goreang pisang, Abi nio pulo".

Baranti lah ayah di muko kadai orang manjua goreang pisang, dibali ayah samo Abi goreang pisang limo dan goreang ubi jala limo pulo. " ado yang Abi bali lai?" kecek ayah, " indak yah alah tu" jawek Abi.

Sampai di rumah abo, nampak abo sadang mamanciang di tabek dakek rumah. " Abo..." Abi basorak dan mangaja abo nan sadang mamanciang. Abo langsuang galak, dan nampak sanang bana mancaliak cucunyo tibo. Langsuang Abi dipaluak dek abo.

Alah hampia satangah jam Abi, ayah, jo abo mamanciang di tabek alah dapek duo ikua lauak Nila. " Alah tu kecek abo, antaanlah ka nenek di dapua, bia dipanggang nenek lai" kecek abo. Langsuang Abi mambaok lauak nan alah dapek untuk diagiah an samo nenek.

" Nek,..ko lauak nek", kecek Abi. Takajuik nenek, " Bilo sajo tibo cucu nenek ko" kecek nenek. " Tadi Abi sampai lai nek, lah mamanciang lo Abi samo abo nek" jawek Abi. Sanang pulo hati nenek dan Abi dipaluak dek nenek karano taragak samo cucunyo.

Samantaro nenek mamanggang lauak jo mambuek samba lado, Abi samo abo, dan ayah makan goreang pisang di teras sambia bacarito. Abi lah habis pisang goreang duo, " nyam, nyam" tadanga kunyah Abi.

Hari lah hampia siang, abo maajak Abi dan ayah untuak sumbayang dulu ka surau dakek rumah, " nah, sumbayang wak dulu uranglah lah azan di surau", kecek abo.

Pailah Abi, ayah, dan abo bajalan ka surau nan indak jauah dari rumah abo.

Pulang dari sumbayang di surau, langsuang masuak ka rumah nampak lah tahidang di meja lauak panggang nan dibuek nenek. " ndeh lamak baunnyo lai nek" kecek Abi. " Abi nio makan banyak- banyak kecek abi". " Makanlah banyak- banyak nak kecek abo, bia cucu abo capek gadang dan bisa manolong abo ka parak". Ayah samo nenek galak mandanga kecek Abi samo abonyo.

Batambuah makan Abi jo ayah. " nek bisuak Abi nio baliak lauak panggang ko yo nek" " jadih Bi" jawek nenek. " Bialah beko sore abo mamanciang baliak bia bisa Abi baok pulang, dan bisa lo dipanggang dek bundo di rumah" kecek abo.

Hari lah sore Abi minta izin ka abo jo nenek untuak baliak pulang lai. Dan nenek lah mambarasiahan lauak nan dipanciang abo untuk dibao Abi jo ayah pulang ka rumah. " makasih yo abo, nek, Abi pulang lai". Basalam Abi samo abo jo nenek dan dipaluak abo jo nenek. " bisuak- bisuak main baliak ka siko yo Bi", kecek nenek jo abo. " iyo nek" jawek Abi.