Tantu iyo perai mah...

"Lamak sado alahnyo makanan jo pabukoannyo ndak",kecek surang kawan ka kawan nan ciek lae. Kawan nan sadang duduek tasanda dek kakanyangan tu indak manjawek do. Inyo sibuk mangipeh-ngipeh mukonyo jo kopiah hitam nan inyo bukak dari kapalonyo.

"Tantu iyo lamak, perai mah. Cubolah babayie rancak makan di rumah lae",kecek kawan surang lae manjawek jo suaro kareh sambie mancukie gigi jo lidih dongkrak nan diambieknyo dari kotak api-api.

Kawan nan mangecek partamo tadi agak tasingguang bantueknyo dek kecek kawan nan sabanta ko. Inyo bae tagak taruih bajalan ka tampek aie mineral. Inyo minum sagaleh langsuang indak pakai baranti maangok bagai do. Mungkin inyo manahan emosi untuak indak mambaleh kecek tadi.

Kalau dipikie-pikie ado juo batuenyo garah kawan nan sabanta ko walau agak kasa baenyo. Papatah Minang mangecekkan "Condong mato ka nan rancak, condong salero ka nan lamak". Itu batue adonyo, ditambah pulo kalimatnya"apo lae perai batambah lamak nyo mah". Kok ka babayie bapikie duo kali juo dibueknyo. Kok lamak banalah tapi kalua lo pitih dari daku sarawa, agak beda juo jadinyo. Nan rancak iyo perai, sudahlah lamak perai lo lae.

Kancag ka nan perai, indak dipungkiri pasti banyak urang takahbiko mah. Dipakai bana prinsip ekonomi "Dengan modal sekecil-kecilnya untuk mendapat keuntungan yang sebesar-besarnya" Kalau dapek iyo gadang nan masuek jo pangaluaran nan saketek. Baa kiro-kiro dek dunsanank? Lae satuju?.....

Solok, 23 Maret 2025

#Tantangan menulis hari keenambelas