Pakupis (52)

Dinten ayeun ping 21 Pebruari urang mieling poe basa indung internasional. Jalaran abdi mah urang Sunda, nya bade ngiring ngareuah-reuah teh ku jalan midangkeun hiji carita pondok nganggo basa Sunda.

Basa Jumat kamari abdi ngawulang kelas 7. Pelajaran nu didugikeun ku abdi nyaeta basa inggris. Tos kabiasaan pami nerangkeun teh abdi mah kedah tarik sora, bari kukurilingan ka unggal bangku murangkalih, sareng panangan seueur gerak pakupis nyaluyukeun sareng eusi materi. Duka kunaon da resep pami ngajar seueur gaya kitu teh. Asa sumanget we kitu.

Raos-raos we abdi ngajelaskeun bari malik ka jajaran kenca. Teu sadar yen di palih katuhu aya kaanehan. Basa abdi malik ka eta jajaran nu seuseueurna murangkalih pameget nu calik di dinga, abdi reuwas. Sihoreng teh aya dua murid pamenget anu nuju serius nurutan gaya abdi ngajar. Roman rarayna sareng pakupis panangana percis siga abdi harita ngajar.

Ningali eta murangkalih nu sakitu menghayati gaya abdi ngajar, atuh abdi teu kiat hoyong seuri. Nya eta ge aya peraosan kirang nyaman mah. Asa dilelewe kitu nya ku murid teh. Tapi da batan janten embek nu nyandak keuheul kana hate mah, tos we dicandak hiburan ku abdi teh.

Dina emutan abdi eta teh cingcirining murid merhatoskeun. Terpesona panginten kana kaluarbiasaan gaya ibu guruna nu geulis, bageur, pinter, tur capetang rame kitu ngajarna.

Heuheuy deudeuh ngahibur anjeun we abdi mah. Da jeung bari dienyana abdi mah geulis. Istri atuh da di mana-mana ge nya geulis. Moal kudu disebat kasep, nya.

Wilujeng wayah kieu we sadayana. Wilujeng mieling poe basa indung internasional. Pami sanes urang nu ngamumule basa indung, saha deui? Pami teu dianggo, teu dilarapkeun dina ucapan sareng tulisan, ulah dugikeun haneueul pami kin basa indung urang punah lantaran teu aya nu ngalestarikeun. Urang Sunda nya kudu bisa nyarita ku basa Sunda atuh.

Ieu dongeng abdi. Cing mana dongeng baraya?

Sukabumi, 21 Pebruari 2022