Pulang dari sakola, tuka baju sudah tu makan bagageh-gageh. Kawan-kawanlah manunggu di lua. Kajai, sitenek jo perlengkapan mainan lainnyo lah sadio untuak ka dibao.

Sudah makan tanpa ba bi bu langsung balari kalua.

"Kama kau lai?" Kecek uni nan paliang gadang.

"Mainnyo, kama lo lai." Menjawek tanpa ado raso takuik.

"Tu piriang makan kau sia nan ka mambasuah? Kau kecek an pembantu den."

"Sabantanyo."

Ndak nio mambuang-buang wakatu, batingga an uni nan sadang baturo-turo ko. Kalau didanga an amuah ndak jadi bamain. Makonyo langsuang ambiak keputusan.

"Capeklah pai wak lai," sambie balari ma ajak kawan.

Kawan-kawan mancaliak denai balari langsuang pulo manuruik an di balakang.

Kasak kusuk basigageh ka rumah kawan. Tibo disitu langsuang ma onjak-onjak main kajai. Ndak peduli pakai indorok. Malompek satinggi-tingginyo. Sahinggo takimbah kulik tampak isi. He....

Lah panek dek ma onjak-onjak paruik mulai litak. Apo nan takana...?

Ayo yang tau tunjuak tangan...!

Sambie manunggu nan ka tunjuak tangan wak lanjuik an carito.

Dek litak paruik samakin ndak bisa diajak kompromi, bajalanlah batigo ka dalam parak. Nampak paraweh sadang babuah pulo. Tibo di bawah batang paraweh langsuang beraksi.

Bak baruak mamanjek karambie lancar jaya sampai di ateh. Tangan beraksi dan mulut pun siap karajo samo.

Bamakanlah paraweh ciek jo duo. Nan paruik lah mulai aman taraso. Bacari canggah paraweh nan bisa untuk duduak santai. Kawan nan paliang ujuang manggoyang-goyangan batang paraweh ko. Samakin digoyang samakin sero.

Ba baelah tagak nak kancang goyangannyo. Manggarasau cando angin salimbubu. Nan galak badarai-darai. Cando awak punyo nagari. Nan lain manompang.

Amaaaaakkk...

Talingo raso kanai cucuak. Marawuang ma imbau amak. Dek talampau sakik lupo baraso sadang mamanjek.

Bummmmm...

Jatuahlah cubadak ko. Nan lain tagarajai pulo. Tibo ditanah bapaciklah pangka talingo nan sakik dako. Rupo e disangek kararawai. Dek ado nampak tabang saikue du ikue.

Kawan-kawan nan jatuah tadi bukannyo manangih malah galak gadang-gadang. Nan awak lah sirah muko manahan sakik.

Ha ha ha...

"Mako e ndak pandai mamanjek sok bagak lo," kecek nan sorang lai.

"Ndak pandai mamanjek, ndak pandai mamanjek juo nan kau baco. Pangka talingo den dilajang kararawai."

"Iyo?. Co caliak?"

"Iyo mah. Capek lah pulang. Agiah minyak samba lado."

Dek awak nan ongok tadi baturuik an pulo kecek kawan ko. Balari-larilah pulang ndak tantu nan tingga jo nan tabao. Baru sajo tibo di rumah langsuang ka dapue mancari minyak samba lado.

Basingkok an tuduang nasi. Rupo e samba ndak pulo ado. Lai saketek, lado nan lakek-lakek di piriang sajo nan tingga lai.

Bakawik lah samba lado dako jo jari. Sudah tu langsuang ba apuih an ka pangka talingo.

Ondeh maaaakkkk...ndak tangguang angek pangka talingo ko do. Tabik paluah dingin awak dek e sanak.

Sudah tu tamanuang duduak di dapue. Tasanda dek manahan sakik. Ubek nan ba apuih an tadi ndak manalok do. Yo ndak tabado sakiknyo do. Lah mulai kalua aie mato.

"Dek apo kau?" Tanyo Uni tadi.

"Di lajang kararawai," manjawek sambie manangih.

"Mako e jan mati karancak an juo. Baa raso e, lai sakik?"

Ndak dapek jawek awak do sanak. Tapaso haniang sajo. Nan pangka talingo bapacik an juo. Lah mulai taraso mambangkak. Sakiknyo yo Allahu rabbi.

Baa sanak, lai parnah marasoan sarupo nan denai carito an?

#caritomasokaciak

#menebarvirusbahagia