Corona dalam Pantun

Tantangan Menulis Hari ke 30

Tantangan Gurusiana

Baparak di tabiang gendiang

Luruih ka bawah ka koto kaciak

Hari nan sadang sanjo rayo

Tasintak urang nan santiang

Tagaduah urang nan cadiak

Dek corona nan lah tibo

Antah lakuak antah batarah

Jalan bakelok di ujuangnyo

Antah kutuak antah musibah

Tuhan babuek sakahandaknyo

Dari Wuhan datang Corona

Tuan jo suri lah kanai pulo

Kalau Tuhan maagiah musibah

Ilmu nan tinggi indak paguno

Padang data jalan ka bukik

Rami dek anak mudo-mudo

Urang lua dapek panyakik

Kito nan dapek sansaronyo

Sarumpun talang dalam parak

Diambiak sado nan paguno

Walaupun malang tibo di awak

Pataguah sajo iman di dado

Bukan talang sumbarang talang

Talang pamaga parak kito

Bukan malang pakaro malang

Kadang hikmah di baliak iko

Sarawa panjang dalam lamari

Ba saku-saku muko balakang

Kalau Tuhan nak ka mambari

Indak bapintu bake datang

Sawah gadang panjang bakelok

Etan di dakek banda gadang

Ambiak sajo sado nan elok

Nan buruak buang ka balakang

Supadan kito baparak

Pintalak dari dulunyo

Tando kito hiduik salingka

Bapasan denai bake sanak

Bukan himbauan dari ambo

Aturan nan dari pemerintah

Batamu bajago jarak

Basalam buliah dalam bathin

Baitu dulu samantaro

Bukan denai maungkai sarak

Indak mamutui silaturrahim

Ampun sabaleh nan jo kapalo

Sungayang, 19 April 2020

Terimakasih untuk sang inspirator.