Hari menulis ke-23 (709)

#TantanganGurusiana2

.

Galak di nan Kalam

(Tertawa dalam Gelap)

(Cerpen)

Oleh: Mursyidah

Angah Baya lah pingsan dek katakuikan, karano tasarobok jo makhluk indak jaleh. Indak ado urang nan tau, apolai manampak baa kajadiannyo. Andai sajo nan mambuek Angah Baya pingsan tu adolah urang, yo itulah nan bisa manjalehan kajadiannyo.

Kiro-kiro satangah jam sasudah kajadian, tibolah Ajo Pudin ka tekape. Nan keceknyo, inyo kebetulan sajo lalu di muko rumah Angah Baya. Inyo pun takajuik mancaliak dek apo Angah Baya takongkang di laman. Mantun carito Ajo Pudin ka urang di lapau, sasudah manolong Angah Baya dari pingsannyo.

Urang nan mandanga sato pulo takajuik, jo batanyo-tanyo apo sabananyo nan tajadi ka diri Angah Baya. Mako pailah babarapo urang nan di lapau tu ka rumah Angah Baya manyayiahi pakaro tu.

Jo barek hati Angah Baya bacarito tantang apo nan dialaminyo tadi, sambia mancaliak reaksi urang-urang tu, tarutamo Ajo Pudin. Angah Baya indak yakin kalau nan mambueknyo pingsan tu adolah makhluk sajenis hantu. Tapi inyo ndak namuah tunjuak iduang doh. Angah Baya yakin karuah ko kan janiah lamo jo lambeknyo.

Urang nan mandanga tutua Angah Baya tapurangah. Apolai Malin Marajo nan tasabuik pandeka nan alim bijaksano di kampuang Santiko tu. Jo satangah berang Malin Marajo bakato, "manuruik pancaliakan ambo, kajadian ko indah kalakuan hantu balau ko doh, iko pasti ulah urang nan ado mukasuik buruak ka bakeh Angah Baya ko. Iko indak bisa dibiakan, akan ambo cari sia urangnyo sampai dapek!" mantun kecek Malin Marajo manggaritih.

Mandanga ancaman Malin Marajo, urang-urang nan ado di rumah Angah Baya tu katakutan. Ado nan maunduakan kapalo, ado nan manggigia, ado nan saliang pandang, ado pulo nan pucek pasi mukonyo. Indak ado nan barani manjawek kecek Malin Marajo salain Angah Baya nan mangatangahi.

"Ndeh, takuik ambo mandanga garetak Malin ko mah. Manyasa pulo ambo bacarito jadinyo," kato Angah Baya mananangkan.

"Tananglah, Ngah. Urang jahek indak buliah dipaliharo di kampuang kito ko. Karuah kampuang jadinyo. Indak nyaman awak tingga di siko. Paralu urangnyo diagiah palajaran agak sakali jo tangan ambo ko," mantun jawek Malin Marajo di adokan urang banyak.

Ajo Pudin nan sajak tadi manggigie sisunguiknyo dek takuik ka Malin Marajo, mamuta utaknyo untuak maluncua kalua dari rumah Angah Baya. Inyo bae basandiwara sakik paruik nandak ka kakuih. Tapi cadiak buruaknyo tatangkok dek Malin Marajo.

"samo kito kalua, Jo. Tunggu sabanta lai. Alun salasai ambo mangecek lai," pintak Malin Marajo ka Ajo Pudin.

"Ambo tasasak, baa caronyo," jawek Ajo Pudin mailak.

"Usah mancari alasan, Jo! Ambo lah tau kulikaek Ajo ko mah," sangik Malin Marajo.

Ajo Pudin suruik cando kuciang nampak lidih. Rono pucek mukonyo batambah jaleh kanai cahayo lampu senter Malin Marajo.

...

(Basambuang pulo baliak minggu ka tibo, Sanak. Saba, yo...)

Kapalo Hilalang, 23012022