# Tantangan hari ke 74

Edisi Bahasa daerah

Bulan puaso tingga 5 hari lai,  tapeknyo ari jumaik bisuak tanggal duo puluah ampek April ko. Biasonyo manjalang puaso ko taruih pulang kampuang, ka maliek pusaro nan paliang di sayang ama jo nenek. Sarato basilaturahmi jo dunsanak-dunsanak sarato jo urang kampuang paimbau pulang. Dek  marantau  lai dibaliak dapua kecek urang minang, dek lai dakek jaraknyo dari tampek marantau.

Tapi kini alum bisa pulang kampuang do, karano kecek pemerintah awak di rumah se dulu, supayo virus ko penyebaran jan sampai ka kampuang. Bagi nan lah kakampuang jan lupo isolasi mandiri di rumah, salamo 14 hari,  alum buliah basbok jo urang kampuang, jago jarak jo urang diateh rumah. Sia nan dak ka ibo dak bisa pulang ka kampuang,  karano sagalo nan dikampuang maimbau-imbau untuak pulang. 

Tapi walaupun awak dak pulang usahoan silaturrahmi ko bajalan taruih,  kini dek  teknologi lah samakin canggih banyak aplikasi di hape nan bisa dipakai untuak basilaturrahmi jo dunsanak yang di kampuag dan jo urang kampuang, jauh di mato dakek di hati. Tapi nan ibo yo dek dak bisa maliek pusaro urang gaek,  di usahoan pabanyak se doa kapado Yang Kuaso, Allah SWT.

Urang kampuang paimbau pulang,  mudah-mudahan ka kampuang awak dak sampai virus ko, dan capek lah hilang virus ko, bisa awak basobok baliak di kampuang nan tacinto. Satinggi-tinggi tabang bangau hinggoknyo ka kubangan juo, sajauah-jauh pai marantau baliaknyo ka kampuang juo. 

Rumah,  18 April 2020