#TantanganGurusiana

#Tantangan Hari ke 25

Raso tangiang-ngiang ditalingo, wakatu mangecek di talepon jo bundo nan kini barado dikampuang kito Payokumbuah nan tacinto.

Denai baco SMS nan isinyo, " Taragak pulo bundo bacarito-carito, jo makan masakan nan ananda buek

Bilo kito bisa basuo nyo?" Bundo kini surang sajo dirumah, kok ka lalok mato indak pulo namuah dilalokkan do, kok dapek usahokan anaknda bisa pulang juo"

Hondeh Bundo Kanduang nan denai cinto. Raso taragak denai ka Mandeh antah lah gaknyo. Kalau dikecekkan bana isi hatiko, Indak bisa rasonyo denai jauah jo Mandeh kanduang do, tapi baalah, anak mandeh satiok ari pai manyambuang iduik ditanah rantau.

Iyo banalah tanah rantau denai dakek dari kampuang tampek mandeh basimpuah mananti anak nan batujuah kok lai katibo juo mancaliak induak nan alah sapuah.

Titiak aia mato denai mandeh, mandanga kecek mandeh, "bakraso iduik indak kalamo, alah taraso lamah badan kiniko, indak talok bagai mangakok karajo, untuak badan surang sajo indak takao. Apolai kamamasak untuak anak jo cucu nan tiok sabanta tibo"

Mandeh Kanduang, nan tingga surang dirumah kokini. Lai bana badakek tingga jo anak minantu. Tapi nan Mandeh indak namuah diajak lalok dirumah anak² tu.

Baarokkan juo anak nan bisa mangawankan mandeh dirumah nan bakraso istana bana dek Mandeh. Baitulah kecek urang - urang tuo daulu, baralah kasanang dirumah anak, nan rumah surang indak ka lupo

Mandeh nan denai Cinto, pulang karajo denai jam limo di hari Jumaah nanko. Taraso latiah badan nanko, karano sajak pagi bakarajo.

Tapi denai bausaho bia bisa basuo jo Mandeh nan kini sadang tabedo, sakik salemo jo batuak bagai tadanganyo.

Jam duo tangah malam denai baru tibo tampek bundo. Denai caliak Bundo alah lalok ruponyo. Ado raso ibo mancaliak bundo sasak angok bantuaknyo.

Bagaruih² taranga ditalingo wakatu Bundo maelo angoknyo. Denai usap kapalonyo dan denai biakan sajo bundo lalok dek ari alah tangah malam pulo.

Dalam hati denai badoa ka nan Maha Kuaso, sihaik juo andaknyo bundo, jaan pernah diagiah sakik² lai Bundo nan denai cinto.

Bisuak pagi denai jago, denai caliak Bundo baru sajo malipek talakuang abih Sumbayang Subuah nampaknyo. Takajuik bundo maliek denai alah dimuko biliaknyo.

Nampak galak manih diwajahnyo, jaleh bana galak mandeh sanang ati mancaliak anaknyo alah dipalupuak mato.

Denai caliak bundo sanang bana hatinyo. Susu angek Anline alah tasadio untuak minum pagi nyo.

"Iko bana lah nan Indak bisa bundo lupo, raso pariso anaknda nan indak ado dek nan lain"

" Ondeh Bundo, jan lah coitu bana Bundo mamuji ambo, dek anak lain kok tingga bundo dirumah inyo mungkin antahlah gaknyo pelayanan nan inyo agiah untuak bundo.

Dek Ambo jauah dari bundo sakali² kito basuo tantu iyo ambo bisa manyanangkan hati Bundo jo caro iko" Bundo denai di usia tuo, alah salapan puluah limo taun umua beliau kini ko.

Bersyukur pado nan Maha Kuaso, bundo Ambo masih sehat, walau talingo alah payah mandanga, tapi mato masih tarang mambaco.

Mambuek jo manulis SMS masih jaleh bahasonyo. Kalau masakan Bundo, jaan ditanyo. Apo nan dibuek dek Bundo jan diarok ka basiso. Abih tandeh dek anak jo minantu sarato cucu nan kalau tibo karumah Bundo selalu malapeh salero.

Baalah Bundo mangecekkan indak talok karajo, ado² sajo nan datang karumah bundoBundo nan sanang hati manarimo tamu nan tibo, baa kabaa lah mamasak juo untuak anak nan di cinto.

Itulah nan namo urang tuo. Walau taraso tabedo namun tetap mambuek anak sanang hatinyo.

Mandeh kanduang kini kito pai bajalan basamo² anak² nan sangat sayang ka bundo. Ado uda, uni² cucu juo ikuik samo².

Manyanangkan hati bundo nan sangaik katuju pai bajalan² kalua dari rumah mancuci mato jo mancuci salero.

Bundo bisuak Anak bundo pai ka rantau lai. Isuak ado wakatu kito basuo ditampek nan indak akan pernah ananda lupo. Payokumbuah nan denai cinto.

Salamaik malam bundo, semoga bundo senantiasa sehat² salamonyo.

Payokumbuah

08 Februari 2020

MAILIFDA