Hari kiniko mah sanak hari libur dari sagalo rutinitas awak dalam malaksanakan tugeh sahari-hari manjadi anak buah pamarintah ko, kok hari nan biaso awak sibuk jo urusan karajo di lua rumah, kiniko sabaliaknyo awak ka disibuk an jo karajo rumah nan ka dirapel salamo saminggu sabalunnyo, nan jaleh awak yo harus basiap-siap jo tanago ekstra, tapi jan cameh pulo di kampuang awak ko mah sanak terkenal jo minuman panambah tanago jo stamina yaitunyo minuman teh talua.

            Nan kiniko ambo indak ka baciloteh tantang khasiat minuman khas Minangkabau ko doh atau tantang caro mambuek teh talua nan lamak sabab ambo paratian lah banyak kawan-kawan ambo nan manulih tantang khasiat jo caro mambuek minuman teh talua nan lamak. Ambo kiniko mah sanak ka maambiak parumpamoan urang nan gaya hiduiknyo co teh talua ko. Apo tu gaya hiduik co teh talua ko sanak?

            Kiniko marilah awak samo-samo mamparatian panampilan teh talua ko sanak, teh talua nan mantap tu yo nan tinggi ruoknyo, tando rancak kambangnyo puta talua tu dek pambueknyo mah, samakin tinggi ruok teh talua ko tu isinyo atau aienyo bakurang pulo. Parumpamoan urang nan tinggi ruok ko iyolah urang nan gadang hoyak se nyo tapi kok di caliak na isinyo ndak bara pulo doh cumannyo pandai bamain peran sahinggo samakin tinggi ruoknyo inyo makin nampak rancak dek urang banyak.

            Handaknyo awak urang Minang ko mah jan sarupo teh talua ko, tinggi ruok se tapi isi nan ka diminum mah saketeknyo, pakailah ilimu padi katiko nyo barisi nyo marunduak, urang nan tinggi ruok caro kasanyo yo rang nan gadang ota, kecek ndak tangguang-tangguang doh sanak, karajo urang ko dalam panilaiannyo kurang se atau adoh se salahnyo, tapi kok diadok an bana karajo tu ka inyo ndak lo salasai-salasai bana doh, kok ndak salasai karajonyo pandai lo nyo bakelah itu sabab dek adoh urang lain panyababnyo.

            Urang nan tinggi ruok bak cando aie bariak tando tak dalam, mako dari itu sanak kasadonyo sabagai makhluk Tuhan nan Maha sagalo-galonyo jan lah adoh sipaik maraso lah labiah bana, maraso tinggi bana ilimu, marilah awak samo-samo maingek baso di ateh langik masih adoh langik. Urang nan tahu jo diri katiko nyo mandapek ilimu samakin nyo tahu bahaso maha lawehnyo ilimu Allah tu. Awak manusia ko mah cuma dapek saketek dari ilimu Allah nan Maha bakuaso di langik jo bumi nan ko. Jan sampai awak tajarumuih ka sipaik urang Nan Tinggi Ruok, baru saketek ilimu nyo lagaknyo co urang nan sangaik balabiah bana, mari awak samo-samo mamakai ilimu padi makin barisi makin marunduak, untuak mancapai itu awak harus jadi urang nan tabuka manarimo masukan atau kritikan urang di sakitar awak, sabab nan ka manilai awak adolah urang lain. Karano adoh lo mah sanak urang nan di agiah saran atau kritikan nyo malah berang bahkan mamburansang, tasingguangnyo, maraso di randahan. Nan rancak kan katiko awak di kritik, di agiah saran atau diingek an awak tu batarimo kasih ka urang tu sabab kok kamalenceng tindakan awak, awak bisa babaliak baliak ka jalan nan bana.

            Marilah awak basamo baniaik indak takah teh talua Nan Tinggi Ruok, ruok tinggi isi saketek, lah panuah se galeh dek ruok bahkan sampai malimpah nan isi saketek nyo nan ka diminum urang, awak ko alun sia-sia lai, masih banyak urang nan santiang salain awak tapi gaya hiduiknyo biaso-biasao sajo, ndak kanampak an kalau inyo banyak isi doh (ilimumyo).

Padang, 08 Maret 2020