Neng jaman sekie utawane kondang diarani zaman now. Bocah neng jaman kie beda karo gemiyen. Nek bocah jaman gemiyen esih kurang sandang pangan. Bocah siki sandangane apik-apik, panganane enak-enak akeh bangat wenanae nganti bingung. Gemiyen bocah--bocah dolanane paling penekan, umpet-umpetan, gandon. Bocah sekie dolanane HP android sing canggieh ra ketulungan.

Sayange ana babagan sing merekna atine inyong mandan nggadug. Nek Bocah jaman cilikanku gemiyen maring pak guru lan bu guru ngajenine ora lumrah. Nek agi ngendika ora wani ana sing semaur. Nembe rawuh neng sekolahan langsung pada rebutan salaman lan nggawakna tase pak guru. Nek mlaku neng ngarepe gurune dokong-dokong. Kue bocah jaman jadul gemiyen.

Sekie wis beda. Bocah sekie boro-boro mlakune karo ndokong nek neng ngarepe gurune. Mlaku ya mung gari sruntul ora nyengir ora mesem apa maning dokong. Mbuh karena wedi apa pekewuh ya ra ngerti. Kayane gurune wis pada due ilmu halimunan dadine ra katon neng muride. Nek ketemu bocah sing wis pada lulus, petukan neng dalan umpamane. Sing akeh ya pada reka-reka ora menangi. Inyong crita karo kanca-kanca jebul pada bae. O ya wis syukur berarti ora mung meng Inyong tok. Ya pancen ra kabehan kaya kue. Sing semedulur ketemu neng ndi-ndi semanak ya ana.

Sifate bocah siki wis beda mergane pengaruh globalisasi. Sekie informasi apa-apa bangat gampange gole mlebu. Lewat TV lan internet salah siji dalane. Bocah kan esih lugu, dadi apa sing de tonton ya sing de anggap panutan. Contone neng sinetron lan FTV gole nggambarna tokoh utama bocah sekolah mesti sing gaul, mandan nakal, dadi idola kancane mergane meng sekolahan nggawane mobil, gole nganggo klambi ora dilebokna, bocah wadon roke senduwure dengkul ditambah maning fokus utama ceritane udu neng prestasi sekolaeh tapi neng babagan percinataan. Ambeke pacaran digambarna kaya wujud cinta sejati. Padahal jelas-jelas islam kue nglarang babagan pacaran. Ora mung islam, neng budaya jawa ya ora nana pacaran. Wong gemiyen pada dijodohna, manut maring wong tua. Nyatane ya uripe tentrem, ra akeh sing pegatan. Malahan artis kae sing senenge dipol-polna dela bae pisahan.

Jajal nek kaya kue sing salah sapa. Bocah ndina-ndina de cekoki barang ra bener, akhire kebatin neng bocah, lewih parah maning dianggap panutan. Sing bisa kaya artis deanggap keren utawa gaul. Tapi globalisasi ra mungkin arep de andegna. Sekie dewek sebagai wong tua due tugas sing lewih abot. Nek wong tua jaman gemiyen mung mikir sandang karo pangan lan ndidik. Sekie dewek kudu due cara nangulangi bahaya budaya sing ora pas.

Carane kepriwe?. Nomer siji wong tua kudu mbekali anake nanggo iman. Sebab iman arep dadi benteng sing kuat, ajaran apa bae sing ora apik ora gadang mlebu neng atine bocah nek benteng imane kuat. Kejaba kue iman juga manfaat bangat nggo nuntun lakune bocah, kanthi iman bocah teyeng mebdakna endi sing apik lan endi sing ala. Sebab sekie akeh bocah pinter pada keblinger, contone akeh pejabat sing pada pinter nanging korupsi. Mergane imane ora kuat.Seliane kue iman juga ndadikna tujuan uripe lewih jelas. Bahagia ndunya akherat.

Cara ndidik bocah dadi bocah sing iman kudu ancan. Miturut ahli misuwur. Demolaih sekang wetengan pas bocah esih dekandut biyunge. Si biyung ra kena ngomong ala kudu ngomong sing apik-apik mergane bayine bisa ngrungokna omongane si biyung. Lewih dianjurna maning Biunge sering maca Al-Quran sebab menurute para ilmuwan, Wacanan Al-Qur’an bisa kanggo nyerdasna si jabang bayi. Tur ya biyunge juga olih pahala. Manfangate malah dobel.

Nomer lorone. Wong tua utamane beyunge, kudu bisa njaga omongane. Sebab omongane beyung pada bae donga. Biasane wong wadon amoh lambene dadine nek ngomong ntlonyor bablas ora de rem. Jere kepengin anake pinter, ning nek anake polah sing madan ra pas karo kekarepane dewek, contone bocaeh penculitan ra karuan, beyunge gampang bangat le ngucap aja nakal dadi bocah, aja angel. Lha nek terus terusan de omongi kaya kue sue sue nek uteke bocah kepatri omongan kue. Dadine bocaeh angel karo nakal. Ngati-ati karo sing jenenge omongan, apa maning nek omongan kue ora sadar.

Nomoer telune dewek kudu nyempatna waktu ndampingi bocah pas nonton TV. Sebab acara TV akeh sing ora pas nggo bocah. Apamaning nek nonton sinetron sing isine kedunyan karo tokoh sing wateke jahat ra ketulungan. Nanging aja nganti beyunge melu ndomblong delombo sinetron, malah nganti melu nangis mbarang. Nek nonton TV diarahna maring acara sing pas nggo bocah.

Nomer papate. Neng umah de sediakna wacan sing isine amanat sing manfangat kanggo mbimbing lakune bocah, kayata crita nabi-nabi, cerita tokoh-tokoh negarawan lan ilmuwan, tokoh-tokoh islam lan buku cerita fiksi sing berbobot. Sokane bocah lewih tertarik neng pojokan kamar desogi rak cilik sing diseni buku-buku mau. Ditata kanti rapi. Unggal dina ndeleng, mesti selot sue penasaran. Bocah kan rasa penasarane gede.

Nomer limane. Wong tua kudu bisa dadi sahabat nggo anake. Terutama nek bocaeh wis ngancik remaja. Dadine bocah wani cerita apa bae maring beyunge. Nek bocah curhate maring kancane, lah kancane mau bocah ora bener kan repot. Kanti dadi sahabat wong tua dadi ngerti anake kancane sapa bae.

Nomer eneme. beyung kudu bisa dadi pertapan temenan nggo anake. Beyung kudu akeh priyatine, lewih perek karo Gusti Allah dadine penyuwunane kobul. Nek aku maca critane wong-wong sing pada wisuwur rata-rata beyunge gede priyatine.

Kabeh mau kue usaha kanggo ndidik bocah sing digadang-gadang gedene bisa nduweni watak satriya mahardika. Satriya kue ya wong sing minulya, wani ngadegna kebeneran lan migunani kanggo wong liya. Mahardika kue berbudi pekerti luhur. Dadi satriya mahardika kue wong sing mulya, migunani kanggo masyarakat, kendel babagan kebeneran lan luhur budi peketine. Kepengin mbok due anak kaya kue?. Bocah sing nduweni watak satriya mahardika mau sing mbesuk debutuhna neng negeri kie, nggo nggawa negeri Indonesia maring jaman keemasan.