Tantangan meulis hari ke 23

#TantanganGurusiana

Manantuan Pilihan

Di sabuah kampuang, tasabuiklah sorang gadih nan banamo Upiak Rubiyah. Banyak kaum laki-laki di kampuangnyo kanai hati dek mancaliak wajah manih Upiak. Inyo gadih rancak bakulik haluih, baiduang mancuang. Alis mato bak samuik bairiang, bibianyo bak saik asam saulai.

Upiak Rubiyah ko indak pulo sumbarangan urang doh. Upiak ko katurunan urang barado. Punyo pusako laweh, harato balindak. Ayahnyo urang tapandang pulo di kampuangnnyo.

Kini Upiak Rubiyah sadang paniang. Sadari pagi Upiak Rubiyah sakik kapalo dek mamikian lamaran Ujang Aziz. Alah duo minggu ko upiak Rubiyah alun dapek maambiak kaputusan. Sabab dek karano maambiak kaputusan tu indaklah mudah, pasti batimbang buruak baiknyo. Samantaro kaputusan tu kini ko ka disampaian ka Ujang Aziz.

Upiak Rubiyah mahelo angok, tabayang kajadian duo minggu nan lalu. Indak paneh, indak hujan, tibo-tibo sajo Ujang Aziz nan alun nyo kenal langsuang manyatokan lamaran. Padohal salamo ko indak ado akrab ko bana.

“Oh, Upiak. Sabananyo alah lamo ambo suko ka Upiak. Kok lai ka buliah, tarimolah pinangan ambo. Awak indak kabacewk-cewek do, awak langsuang sajo manikah.

Upiak Rubiyah nan sadang mandanga musik orgen tunggal kutiko tu, langsuang tapana dek mandanga Ujang aziz malamarnyo. Padohal salamo ko Upiak Rubiyah jo Ujang Aziz ko, sapo tak sapo se. Hanyo sakadar kenal dek sakampuang sajo.

“Baa kok langsuang sajo uda malamar, Upiak. Uda Ujang alun juo tau siapo Upiak lai,”

“Sia sjo urang di kampuang ko indak ado nan indak ka tau jo Upiak. Urang sakampuang sangaik mamuji Upiak. Upiak gadih rancak, katurunan urang kayo dan punyo ayah tapandang pulo. Uda maraso cocok jo Upiak, dek karano kito samo-samo anak urang kayo dan samo-samo anak urang tapandang.

“Ooo, jadi uda Ujang malamar Upiak, karano Upiak dek rancak, sudah tu dek katurunan urang kayo, sarato ayah Upiak dek urang tapandang, tu sababnyo uda malamar Upiak. Bukan dek sabab nan lain?”

Mandanga tanyo Upiak, ujang Aziz gawik-gawik kapalo. Indak tantu apo nan ka dijawek. Salamo ko ujang Aziz iyo acuah se ka Upiak. Tapi dek dipaso Amainyo, makonyo dibaranian malamar Upiak. “Kok baitu tanyo Upiak, iyo ndak dapek aka uda, do. Nan pasti uda tunggu jawek Upiak. Kok ditulak lamaran uda, bukan berarti awak putuih silaturahmi. Awak tatap bakawan.

Mandanga Ujang aziz mangecek cando tu, agak tamanuang Upiak dek nyo. Salamo ko, iyo alun ado nan barani maminangnyo sacaro langsuang, tapi Ujang Aziz ko agak babeda. Sangaik baraninyo ma adoi Upiak. iyo sabana bajiwa laki-laki.

Upiak Rubiyah masih sibuak manimbang-nimbang buruak baiaknyo tantang lamaran Ujang Aziz. Kok di pikia, Ujang ko, iyo dari katurunan urang kayo. Urangnyo gagah, bapandidikan tinggi pulo, tapi ado kakurangannyo. Inyo malamar Upiak dek karano status sosial, bukan ado sabab nan lain.

Upiak malapehan angoknyo nan taraso manyakek dirangkungannyo. Upiak maukia galak manih. Kini alah dapek kaputusan nan ka diambiak. Alah diukua panjang pendeknyo, alah ditimbang buruak baiknyo. Kaputusan nan ka diambiak ko, mudah-mudahan indak ka jadi sasalan. Menikah indak dek karano samo-samo anak urang kayo dan dari keluarga tapandang, tapi menikah itu sabananyo karano Allah.

Padang Beloved City, 23 Januari 2022